2023 ta trayendo pocos conciertos, pero munches allegríes y coses importantes de verdá.
Yera un domingo a les 13h, en plenu vermú, cuando Manuel Paz fizo sonar el mio teléfonu.
Tengo confianza abondosa con elli yá dende que lu conocí de guaje na orquesta del conservatorio del Nalón. Manuel ye un gran músicu y un xestor mui dinámicu y activu. Siempre diz coses importantes y amás eches unes rises de xuru. Poro y magar de ser domingu, garré l’aparatu y falamos abondosamente.
Tardó casi una hora en desplicame’l proyeutu “Canteros del Sonido” de l’asociación Amantigua. Dempués d’estudios musicolóxicos previos había un garrapiellu d’especialistes que llistaron tolos instrumentos musicales qu’apaecen na piedra del románicu asturianu (sieglos XII-XIII). Llueu punxeron a trabayar a otru equipu d’artesanos pa reconstruilos a partir de telemetríes, figures multidimensionales y les poques fontes escrites conocíes como les cantigues d’Alfonso X “El Sabio”.
A lo último, esos instrumentos (rota, rabel, harpa, gaita, gaita rabil, viola d’arcu, cítola…) había que facelos sonar nuna serie de conciertos a concretar nel futuru. Y eso que dalgunos llevaben desaniciaos más de 700 años, como la rota…
Cola réplica de la Rota d’Arlós (sieglu XIII)
Yo yera la persona ideal pa esto, y Manuel sabíalo. Poro, sentime mesmo que si m’hubiera tocao la lotería. Canteros del Sonido, n’adelante “Canteros del Soníu” pola mor del inevitable puxu asturianu de la mio presencia, taba fechu a medida de tol trabayu d’años d’estudiu y desendolcu d’eses sonoridaes arreyaes na música medieval y venceyaes cola tradición asturiana.
La presentación del proyeutu fízose nel RIDEA nun ciclu de conferencies coordináu pola catedrática María Sanhuesa nel qu’andecharon bien d’estudiosos como Tina Cuadriello, María Soledad Álvarez, el propiu Manuel Paz y yo mesmu. Na primer sesión amás toqué al final el primer instrumentu de la serie, una viola d’arcu (réplica de les del pórticu de Compostela y’l Beato de Liébana) y una bandurria asturiana. Les semeyances sonores ficiéronse ablucantes pa tol públicu presente na sala.
A la selmana dempués, concretamente un domingu, llegó la rota del taller almeriense de Carlos González. Y dos díes dempués, el martes, presentémosla nuna rueda de prensa nel Ayuntamientu de Llanera, la primer alministración pública qu’ufrió tolos medios y la financiación pa reconstruyir esta ayalga presente na ilesia románica de Santiago d’Arlós nel conceyu. Y esi día toqué la rota, que suena de restallu, por cierto.
El ayuntamientu de Llanera había financiao tamién un conciertu na ilesia de Santiago d’Arlós, precisamente, aú vino el alcalde Gerardo Sanz, el direutor de Patrimoniu Pablo Gasalla, bien d’autoridaes na materia y públicu abondosu qu’enllenó los dos pases previstos pa los 200 asientos disponibles.
El repertoriu cola OCAS yera suxerente: Carretera d’Avilés (al llau precisamente d’ella) y La fonda de Lola con harpa, una Xota y Resallu con vigulín xunto cola orquesta y dos músicos collacios: Simón San José Lozano y Luis Álvarez Pola.
Amás fice un estrenu a costafecha pa esti día, un cantar entá inéditu sobro “Los Esconxuraos”, quiciabes una de les fiestes cola historia más curiosa (y pagana) de toa España…
Cachu de “Los Esconxuraos”, un cantar que compunxe y orquesté a costafecha pa esti conciertu
Ta perclaro que Canteros del Sonido ye un ésitu qu’agora necesita del puxu de más xente qu’andeche por remanecer tantu patrimoniu musical desaniciau, tanta cultura y música namás nun escaecía por eses figures tallaes na piedra. Les mesmes que sieglu ente sieglu van marafundiándose pola mor del pasu silente del tiempu y l’escaezu pola cultura de nueso.
Enllaz a les noticies na prensa:
