La Selmana de les Lletres Asturianes vien entamándose, como eventu institucional, dende 1980 na primer selmana del mes de mayu.
Esti añu tengo l’honor de tar convidáu a actuar nel Teatru Campoamor d’Uviéu, nel actu central qu’amás fai homenaxe a los fundadores de Conceyu Bable.
La Selmana de les Lletres ye una fecha abondo importante nel calendariu cultural y educativu asturianu. Per exemplu, los profesores de llingua y literatura asturiana empobinen les sos clases al autor protagonista de la selmana, y les autoridaes autonómiques implíquense na defensa del idioma de nueso, que tien proteición nel propiu estatutu d’autonomía del Principáu. Dende los caberos años faense recitales de poesía na Xunta Xeneral y repártense llibros y DVDs de baldre.
Amás de los abondosos recitales de poesía y actos culturales fechos per too Asturies, nesta selmana, destaca’l Día de les Lletres, el momentu principal de la selmana nel que la presidencia de l’Academia de la Llingua Asturiana da un discursu nun acto solemne peslláu pol Himnu d’Asturies nel que s’analiza la situación de la llingua y la lliteratura, y nómbrense amás los nuevos académicos o académiques.
Tamién ye’l día escoyíu polos comerciantes llibreros pa facer un 10% de descuentu nos llibros, cellebrándose n’Uviéu la Feria del Llibru que va dende’l Día del Llibru (23 de abril) al Día de les Lletres (tamién nomáu Día del Llibru y del Discu n’Asturies).
